پەتای ئەنفال
لە سەدەی حەفتی زایندا
دڕندەیەکی چاوبەخوێنی بیابان
نۆبەرەی بەدەویەکان
ڕووی لە وڵاتی ئێمە کرد و
تاڵان و پەتای هێنا
ئەنفالی یەکەم
جارێکیان
لە سەدەی حەفتی زایندا
دڕندەیەکی چاوبەخوێنی بیابان
نۆبەرەی بەدەویەکان
ڕووی لە وڵاتی ئێمە کرد و
تاڵان و پەتای هێنا
ئەوە پاکتاو بوو
هێرشێکی ناڕەوا بوو
نازناوەکەی، ئەنفال بوو ..
هەر کە گەیشت
شاپەکی لەکەلتووری پێشین هەردا
بەدەویەتی لێداکوتا
هەر کە گەیشت
خنخنۆکی مەزدای گرت و
گاتا و یەسناکانی سوتاند
ئەنفال هات و
شارستانیای پێچاینەوە و
کوردستانی لەخوێن گەوزاند
ئەنفال هات و
بەهاری باپیرانی دزی و
یاسای بیابانی سەپاند
*****
لەو کاتەوە
ئێمە پشتمان لەمەزدا کرد
فەرهەنگ و کەلتووری پێشین
هەرهەموویمان لەئاوێ کرد
لەو ڕۆژەوە
بەدوای یاسای ئەوێ کەوتین
پیادەی نۆرمی ئەوێ دەکەین
بەزمانی وان تکا دەکەین
لەو ڕۆژەوە
ستایشی ئەوان دەکەین
ڕوو لە وێین و درۆ دەکەین
کڕنۆش بۆ خوای بیابان دەبەین
*****
ئەنفالی دووەم
لەکۆتایی سەدەی بیستا
لەسەرەتای هەشتاو هەشتا
بەچکەیەکی کەلتوورەکەی بیابان
وەک باپیرانی چاوبەخوێن
وەک پێشینانی دژ بە ژیان
هات و ئەمجارەیان
بۆمب و گازی مەرگی هێنا
هات و ئەمجارەیان
پاکتاوی کوردی هێنا
ئەوە دیسان ئەنفال بوو
پێپەتیانە و بێ مۆرال بوو
هەر کە گەیشت
خنخنۆکی چیای گرت و
کوردستانی لەخوێن خڵتاند
ئەنفال هاتەوە
بەهاری ئێمەی دزی و
سەدان هەزار گیانی وەراند
ئەنفال هاتەوە
سەدان هەزار ڕوانگە
سەدان هەزار ئاییندە
سەدان هەزار هیوای خنکاند
*****
شاخەوان شۆڕش
7-4-2004
سەرنج بنێرە