دەسەڵاتی یەکێتی و پارتیش وەکو هەمیشە خەریکی شەڕە پەڕۆ و ململانێی حزبی بوون و درێژەیان بە گەندەڵی و مەنتالی نانەتەوەیی و خێلەکیانەیاندا. نەیانتوانی یەکگرتووبن و بە ستراتیژێکی یەکگرتووی کوردستانی پێشکەوتووخواز کە مافی کەمینەکانی کەرکوک لەبەرچاوبگرێت، کە خاوەنی کۆمەڵێ پرۆژەی گرنگی ئاوەدانکردنەوە و پێشخستنی شار بێت، بخەنەگەڕ.

هاتنی ئیسلامیستەکانی داعش ئەو دەرفەتەی رەخساند کە کورد خۆی خاوەنداریەتی شارەکە بگریتەدەست، ئێستاس درەنگ نییە بۆ دەسەڵاتدارانی کورد، کە لەسەر پرۆژەیەکی ستراتیژی پێشکەتوو بۆ پێشخستنی شارەکە ڕێککەون، نمونەیەکی جوانتر بەخەڵکی شارەکە وبەهەموو کەمینە ئەتنی و نەتەوەیەکانەوە پێشان بدەن و دوور لە شەڕەپەرۆ و بەرژەوەندی تەسکی بنەماڵە و حزب، دوور لە دەستێوەردانی داگیرکەرانی ئێران و تورکیا. بەداخەوە من لەو دەسەڵاتەی کوردییەی ئەورۆ کە کێشەی رەوایەتی بە کوشندەیی هەیە، ئەوە ڕانابینم.

پێموایە تەنها خەمخۆریەکی کوردستانیانەی سەردەمیانە دەتوانی گرنگی بوونی ئەو ئاڵایە دەرخات و ئەو ئاڵایە بە بەرزی بهێڵێتەوە.
هەر شەکاوە بێت ئاڵای کوردستان لە سەر شاری کەرکوک