مەلا کامەران لەسەر بوونی مافی ژنان هەرەشە لە رۆژئاوا دەکات
مەلا کامەران لەسەر بوونی مافی ژنان هەرەشە لە رۆژئاوا دەکات
ئەو زۆر نیگەرانە لە نەهێشتنی جوداکارییەکان و یەکسانکردنی ژن لەگەڵ پیاودا. دیارە ئەوەی ئەو لە نامەکەدا دەیلێت لە سیستەمی دیموکراسی و سیکولاردا جێی نابێتەوە. نامەکەی مەلا کامەران پڕی هەلەیە، هەروەها مەلا کامەران دەیەوێ سەری رۆژئاواش وەکو باشور لە قوڕی کۆنەپەرستی و داخراوەیەوە بنێت. مەلا کامەران نیگەرانە لەوەی ئەو هەنگاوە سەرەتای هەنگاوی گەورەتر بێت و بیری کۆنەپارێزی ئیسلامی بخاتە پاشەکشە لە ئاستی کوردستان و ناوچەکەدا.
لە رۆژئاوای کوردستاندا یاسایەک بۆ مافی ژنان و یەکسانی ژن لەگەل پیاودا نوسراوە، یاساکە یاسایەکی یەکسانخوازە و هەوڵ دەدات جوداکاری و چەوساندنەوەی ژن نەهێڵێت. هەنگاوێکی بوێرانە و کەموێنەیە کە خۆی لە یاسا کۆنەپارێز و پیاوسالارەکانی ناوچەکە جیادەکاتەوە. ئەو هەنگاوە مەلا کامەرانی توورەکردووە و هەرەشەی کاردانەوەی زیاتر دەکات (لە خوارەوە نامەکەی مەلا کامەران و یاساکەی مافی ژنان داندراوە).
ئەو هەنگاوە، هەنگاوێکە کە دەبوایە لەباشوردا لەگەڵ ڕزگارکردنی لەبەهاری ساڵی ١٩٩١ دا جێگیربکرێت، چونکە لەسەردەمی خەباتی ڕزاگاریخوازی شاخدا خەبات لەپێناوی ئازادی و یەکسانی لایەنی بەهێزی هێزی ڕزگاریخواز بوو و بەهەزاران مرۆڤی جوان گیانی خۆیان لەو رێگایەدا بەخشی، بۆیە خەلكی ئازادیخواز لە کوردستانی ئازاددا چاوەڕاونی هەنگاوی شۆڕشگێڕانە و رەوا بوون. بەڵام بەپێچەوانەوە سەرکردەکان پشتیان لەو پرەنسیپانە و ئاواتی خەلکە ئازادیخوازەکە کرد. دەسەڵاتێکی نانیشتیمانی و پاوانچی و کۆنەپارێز لە باشوردا دەسەڵاتی گرتەدەست، بەمجۆرە لە باشوردا هەرگیز هەنگاوی لەو شیوەیە چاوی بە جیهاندا هەڵنەهێنا و هەموو ئازادیخوازان نائومێدکران.
بەپێی نامەکەی مەلا کامەران، ئەو زۆر نیگەرانە لە نەهێشتنی جوداکارییەکان و یەکسانکردنی ژن لەگەڵ پیاودا. دیارە ئەوەی ئەو لە نامەکەدا دەیلێت لە سیستەمی دیموکراسی و سیکولاردا جێی نابێتەوە. نامەکەی مەلا کامەران پڕی هەلەیە، هەروەها مەلا کامەران دەیەوێ سەری رۆژئاواش وەکو باشور لە قوڕی کۆنەپەرستی و داخراوەیەوە بنێت. مەلا کامەران نیگەرانە لەوەی ئەو هەنگاوە سەرەتای هەنگاوی گەورەتر بێت و بیری کۆنەپارێزی ئیسلامی بخاتە پاشەکشە لە ئاستی کوردستان و ناوچەکەدا. دیارە ئاساییە ئەو وەکو کەسێکی ئیسلامی و کۆنەپارێز دژی ئەو هەنگاوە بووەستێتەوە، چونکە یەکسانکردنی ژن و پیاو لەگەل دینەکەی ئەو و بیروباوەرەکەی ئەودا نایەتەوە.
ئەو دەلێ هەڵوێستم دژی داعش و تاوانەکانی داعش هەبووە، بەڵام نابێ لە دەسەڵاتی شەرع و پرەنسیپەکانی ئیسلام لە کۆمەلگەدا کەمکرێتەوە. دیارە هەر مرۆڤێک خۆی بە خەڵکی ئەو نیشتیمانە بەداعش دەورەدراوە بزانێت و ریز لە سەروەری نیشتیمان و ئازادی مرۆڤەکان بگرێت، ئەرکی سەرشانیەتی نەک هەر هەڵویستی لەدژی تاوانکارانی داعش هەبێت، بەلکو دەبێ بەکردەوە خەبات دژی لەشکری تاریکی و بەربەریانەی داعش و بیروباوەرەکەیان بکات. لەراستیدا هاتنی داعش و تاوانکاری گەلکوژکارانەی ئیسلامیستەکانی داعش زۆر ئازاری داین، بەجۆرێک هەرگیز لەبیرمان ناچێتەوە. لە هەمان کاتدا لە خەو ڕایچڵەکاندین و هوشیاری کردینەوە. ئازارەکانی شەنگال و ئازایەتی کۆبانێ ناچارمان دەکەن بەخۆماندا بچینەوە، ئەوەش بەجۆرێک نابێت، کە دڵی ئیسلامیەکان و هێزە کۆنەپارێزەکانی پێ خۆش بێت.
بەرزڕاگرتنی مافەکانی مرۆڤ و یەکسانی مرۆڤەکان بەبێ جیاوازی لە کۆمەڵگەدا ئەرکی سەرشانی هەر دەسەڵاتێکی یەکسانخواز و پێشکەوتووخوازە. ژنان ئەو بەشەی کۆمەڵگەن کە زۆرترین جۆری چەوساندنەوە و جوداکاریان لەسەرە بەتایبەتی لە کۆمەڵگەکانی رۆژەهەڵاتی ناوەڕاستدا. بەشێوەیەکی سەرەکی هۆکاری ئەو جوداکاریی و چەوساندنەوە و دەستدرێژیانە کەلتوری کۆنەپارێزی پیاوسالاری و داخراوە کە ئایین رۆڵێکی گرنگ و بنچینەیەیی لە پێگەیاندنی ئەو کەلتورەدا بینیووە. ئەگەر ئایین دەسەڵاتی هەبێت ئەو داخراوی و کۆنەپارێزییە زۆر زیاترە و دەستدرێژی و تاوانیش زیاتردەبن.
لە سیستەمی دیموکراسیدا کە تیایدا رێز لە مافەکانی مرۆڤ دەگیرێت و یەکسانی ژن و پیاو لە کۆمەڵگەدا بە پێی کانون و دەستور هەیە، هەروەها ئایین لە ستات جیادەکرێتەوە و دەکرێتە بابەتێکی کەسیی، بەمجۆرە دەسەڵاتی لە بواری یاسادانان و بەرێوەبردندا نابێت ئەو سیستەمە رامیارییەیە کە تائێستا سەرکەوتووترین سیستەمە کە توانیبێتی لەلایەک پارێزگاری لە مرۆڤەکان و ئازادیان بکات و رێگە بە داخراوی و کۆنەپارێزی، وە چەوساندنەوەی ئایینی بگرێت، لەلایەکیتر مرۆڤەکان ئازاد بکات لەوەی پەیرەوی چ بیروباوەڕیکی ئایینی یا نائایینی دەکەن، بەڵام هیچ کەس و ئایینێک بۆی نییە ئازادی کەس پێشێل بکات و چەوساندنەوە و جوداکاری بەسەپێنیت.
هەروەها لە سیستەمە دیموکراسیەکاندا یەکسانی لە نیوان ئایینەکاندا رێزی دەگیرێت و مرۆڤەکانی ئازادن لەوەی ئایین دەگۆڕن یا واز لە ئایین دەهێنن. چەوساندنەوە و جوداکاری بەرامبەر بە مرۆڤەکان لەبەر بیروباوەری ئایینی رەتدەکرێتەوە و پێشێلکاریی ئازادی مرۆڤەکان سزای لەسەرە، ئەوەش بۆ هەموو ئایینەکان وەکو یەکە، یاسا بەپێی ئایینی زۆرینە و کەمینە داناڕشترێت، یاسا سەربە رەنگ و رەگەز و لایەن و ئایین نییە، یاسا بێلایەنە و لەبەررۆشنایی پرەنسیپەکانی مافی مرۆڤ داڕشتراوە. هەروەکو لەئەگەری بوونی پێشێلکاریدا هەموو مرۆڤەکان لەبەردەم یاسادا بەیەکسانی سەیریان دەکرێت و بەپێی یاساکان هەڵسوکەوتیان لەگەلدا دەکرێت.
لەکۆتاییدا دەستخۆشی لەو هەنگاوە بوێرانەیەی رۆژئاوا دەکەم و هیوادارم لە باشوری کوردستانیش لە داهاتوودا یاسایەکی لەمشێوەیە دابڕشترێت و جوداکاری و چەوساندنەوەی ژنان بەپێی یاسا و دەستور کۆتاییان پێ بهێندرێت و بەکردەوە چاڵاکانە لەکۆمەڵگەدا پەیڕەوی یاساکان بکرێت.
شاخەوان شۆڕش
2014/11/15
دەقی یاساکە کە بۆ مافی ژنان و یەکسانی ژن و پیاو لە خوارەوە بخوێنەوە
تێبینی ئەو تێکستە لە هاوڕێی خۆشەویست روناک شوانیەوە وەرگیراوە، کە زۆر سوپاسی دەکەم.
بەرێوبەرایەتی کانتۆنی جەزیرە لە خۆرئاوای کوردستان یاسایەکی داڕشت بۆ بەرجەستەکردنی مافەکانی ژنان لە چوارچێوەی یاسا بنەڕەتیەکاندا ..
ژنانی کۆبانی تەنیا ڕۆڵیان لە بەرەنگاری و شەڕەکانانیاندا نەبوو کە سەرتاپای تۆمارکردنی داستان و نەخشاندنی مێژوویەکی پڕ لە شانازیە بۆ هەموو ژنانی کوردستان و جیهان ..
ڕۆڵی ئەوان کاریگەری هەبوو لە داڕشتنی یاسایەکی کە مافەکانیان لە یەکسانبوونی هەمەلایەنەی کۆمەلایەتی و سیاسی و فەرهەنگی مسۆگەر بکات و وەکو مرۆڤێکی خاوەن بوون و توانا حسابیان بۆ بکرێت ..
گرنگترین ئەو بەندانەی لە یاساکەدا هاتووە :
١. بەرەنگاربوونەوەی هەموو زەینیەتە کۆنەپەرستیەکان ئەرکێکە لەسەرشانی هەموو تاکێکی نیشتەجێی ناوچەکانی فەرمانڕەوایەتی خۆجێی دیموکراتی .
٢. یەکسانی ژنان و پیاوان لە هەموو بوارە جیاوازە گشتی و تایبەتیەکاندا .
٣. یەکسانی ژنان و پیاوان لە مافی ئیشکردن و کرێدا .
٤. هەڵوەشانەوەی مارەیی بەو پێیەی کە ئامانج لێی بە موڵك کرنی مادی ژنانە و لەجیاتی ئەوە هەردوولا ژیانێکی هاوبەش پێکبهێنن .
٥. یاساغ کردنی چەند ژنە بۆ پیاوان .
٦. هەردوولا مافی لێکجیابوونەوەیان هەیە ، بە شێوەی تاکڕەوی جیابوونەوە ڕێیپێنادرێت .
٧. یەکسانی ژن و پیاو لە هەموو بوارەکانی میراتدا .
٨. یاساغ کردنی کوشتنی ژنان لە ژێربیانوی شەرەفدا و ئەژمارکردنی وەك تاوانێك کە هەموو بڕگە مادی و مەعنەوی و یاساییەکانی
لە خۆگرتووە ، وە تاوانبارەکە سزادەدرێت بە هەمان ئەو سزایەی لە بڕگە یاساییەکاندا هاتووە بۆ تاوانباری بکوژی بە ئەنقەست .
٩. یاساغ کردنی بازرگانی کردن بە منداڵان و ژنان بە هەموو شێوەیەکەوە وە سەپاندنی سزای توند بەسەر تاونکارەکانیدا.
١٠. یاساغ کردنی توند و تیژی و چەوساندنەوەی ڕەگەزی بەرامبەر ژنان و ئەژمارکردنی چەوساندنەوی ڕەگەزی وەکو تاوانێك کە یاسا سزا بەسەر تاوانبارەکەیدا ئەدات.
،،،،،،،
ئیداره‌ی هاوبه‌شی کانتۆنی جه‌زیره له خۆرئاوای کوردستان یاسایه‌کی تایبه‌ت به ژنان ده‌رده‌کات، له یاساکه‌دا ماف‌و ئه‌ركه بنه‌ڕه‌تیه‌کانی ژنان دیاریكراون.
ئیداره‌ی هاوبه‌شی کانتۆنی جزیره، یاسایه‌کی به ژماره ٢٢ له ساڵی ٢٠١٤ ده‌کرد، که ناوه‌رۆکه‌که‌ی پره‌نسیپه سه‌ره‌کیه‌کان و حوکمه گشتیه‌کانی تایبه‌ت به ژنانه‌‌و هه‌ر یه‌که له هه‌دیه یوسف و حه‌میدی ده‌هام ئه‌لعاسی هاوسه‌رۆکانی به‌ڕێوه‌به‌ری خۆسه‌ری دیموکراتی کانتۆنی جه‌زیره ئیمزایان کردووه.
ده‌قی یاساکه:
کانتۆنی جه‌زیره
به‌ڕێوه‌به‌رایه‌تی هاوبه‌ش
ده‌قی ژماره ٢٢ ی سالی ٢٠١٤
له‌سه‌ر بنه‌مای به‌نده‌کانی هاوپه‌یمانی کۆمه‌ڵایه‌تی و به ئه‌رێ کردنی ئه‌نجومه‌نی یاسادانان له دانیشتنی ٢٧ مینی ساڵی ٢٠١٤، پره‌نسیپه سه‌ره‌کیه‌کانی و یاسای گشتیه‌کانی تایبه‌ت به ژن ده‌کرد. به‌ڕێوه‌به‌ری هاوبه‌شی کانتۆنی جزره ئه‌م مه‌رسومه‌ی ده‌کرد:
ژنان له کۆمه‌ڵگه‌مان که به چه‌مکی نێرسالاری به‌ڕێوه‌ده‌برێ ڕووبه‌رووی زۆر کێشه‌ی سیاسی، کۆمه‌ڵایه‌تی، که‌لتوری و ده‌روونی بۆته‌وه و ئه‌و دۆخه‌ش زوڵم، په‌راوێز خستن، دواکه‌وتوویی و بێ مافی بۆ ژنان لێکه‌وتۆته‌وه، وێرای پاشماوه‌ی نه‌ریتی باو که بۆته ته‌گه‌ره له به‌رده‌م پێکشه‌وتنی ژنان و په‌رۆشی بۆ ئاینده‌یه‌کی باش سنوردار ده‌کات و بونی چه‌ندین ڕیسا و یاسا و فاکته‌ری چه‌وساندنه‌وه به‌قوڵی شایه‌تی ده‌دات که خه‌باتی ژنان له پێناوی به‌ده‌ستهێنانی مافه‌کانی دا، هێشتاش به‌رده‌وامه و تا ئێستا ئه‌نجامگیر نه‌بووه و ئه‌وه‌ش ته‌نیا کاریگه‌ری خراپی بۆ سه‌ر ژن نیه، به‌ڵکو له‌سه‌ر هه‌موو کۆمه‌ڵَگه له‌وانه‌ش جیابونه‌وه‌ی به ئیراده‌یه‌ک تاک، هاوسه‌رگیری زۆره‌ملێی، فره ژنی و کێشه‌گه‌لێکی که له ژماره نایه‌ن، تارۆژی ئه‌مڕۆ زۆر بارگرانیه. له باوه‌ڕمانه‌وه به گرنگی ڕۆڵی ژن له خێزان دا که کرۆکی بنه‌ره‌تی کۆمه‌ڵَگه‌یه، ئازادی ژن گه‌ره‌نتی سه‌ره‌کیه له ئافراندنی خێزانێکی دیموکراتی و کۆمه‌ڵگه‌یه‌کی دیموکراتی ئازاد و ئاستی گه‌شه‌سه‌ندنی ھه‌ر کۆمه‌ڵگه‌یه‌ک به چالاککردنی رۆلی ژن و به‌شداری له بونیادنان و پێشخستنی کۆمه‌ڵگه. بۆ ئه‌وه‌ش ژن تێکۆشان ده‌کات تا ده‌سته‌به‌رکردن و گه‌ره‌نتی مسۆگه‌ر بۆ پاراستنی که‌رامه‌ت و به‌ده‌ستھێنانی ئازادی و مافی خاوه‌نداری کردنی له خۆی و رۆله‌کانی. له ئێستا به دواوه ڕازی نابێ به په‌راوێز کردنی . بزوتنه‌وه‌یه‌کی که ئازادی بکات پێداویستیه‌کی ده‌ستلێبه‌رنه‌دراوه بۆ به‌ره‌نگاربونه‌وه‌ی ھه‌موو جۆره دواکه‌وتویی، توندوتیژی و کوشتن.
له کاتێکدا که گه‌ره‌نتی کردنی ئازادی ژن و مافه‌کانی له ئامانجی سه‌ره‌کی به‌رێوه‌به‌رایه‌تی خۆسه‌ری دیموکراتی دا ده‌بێ، ھه‌موو پرسه ھه‌ڵواسراوه‌کانی ژن له کۆمه‌ڵگه‌دا چاره‌سه‌ر بکرێن و ئاستی له ھه‌موو بواره‌کان دا به‌رز بکرێته‌وه و ژیانێکی ئارام بۆ مسۆگه‌ر بکرێ و بپارێزرێ له ئاست ھه‌موو چه‌وساندنه‌وه، توند و تیژیه‌ک و مافه ڕه‌واکانی گه‌ره‌تنی بکرێ. له پێناوی ھه‌موو ئه‌وانه‌دا کۆمه‌ڵێ پره‌نسیپ و بنه‌مای گشتی تایبه‌ت به ژنمان بۆ یه‌کسانی کرده‌یی گه‌ڵاڵه کرد، له پێناوی بونیادنانی کۆمه‌ڵگه‌یه‌کی دیموکراتی ژینگه‌یی ( ئه‌کۆلۆژی) ئازاد.
پره‌نسپه سه‌ره‌کیه‌کان:
１. تێکۆشان له‌به‌رامبه‌ر عه‌قلیه‌تی ده‌سته‌لاتداری کۆنه‌په‌رست له کۆمه‌لگه‌دا، ئه‌رکی ھه‌موو تاکێکی ھه‌رێمه‌کانی به‌رێوه‌به‌رایه‌تی خۆسه‌ری دیموکراتیه.
２. یه‌کسانی له نیوان ژن و پیاو له ھه‌موو بواره‌کانی ژیانی گشتی و تایبه‌تی.
３. ژن مافی ھه‌ڵبژاردن و خۆپاڵاوتن و وه‌رگرتنی ھه‌موو پۆسته‌کانیان ھه‌یه.
４. پابه‌ندبوون به پره‌نسیپی ھاوسه‌رۆکی له به‌رێوه‌بردنی ھه‌موو ده‌زگاکان دا.
５. ژن مافی دامه‌زراندنی رێکخراوه سیاسی، کۆمه‌ڵایه‌تی، ئابوری، که‌لتوری، رێکخراوه‌ی پاراستنی ڕه‌وا و رێکخراوه‌ی تری تایبه‌ت به خۆیان ھه‌یه که له‌گه‌ل ھاوپه‌یمانی کۆمه‌ڵایه‌تی ناکۆک نه‌بێ.
６. ئاماده‌بونی نوێنه‌ری ڕێکخراوه‌کانی ژنان و رێکخراوه‌کانی مافی مرۆڤ وه‌ک چاودێر له‌کاتی دارشتنی ئه‌و یاسایانه‌ی که له کاتی نائاسایی دا له ئه‌نجومه‌نی یاسادانان ده‌رده‌کرێ به بانگھێشتێکی پێشوه‌خت له ئه‌نجومه‌نه‌وه.
７. کاتێ له ئه‌نجومه‌نی یاسادانان یاسایه‌کی تایبه‌ت به ژن ده‌رده‌کرێ، ده‌بێ ئیراده‌ی ژن ڕه‌چاو بکرێ.
８. یه‌کسانی له‌نێوان پیاو و ژن له مافی کار و کرێ.
９. یه‌کسانی له نێوان شایه‌تی ژن و شایه‌تی پیاو له ڕووی به‌ھای یاساییه‌وه.
１０. قه‌ده‌غه‌یه کچان بێ ره‌زامه‌ندی خۆیان ھاوسه‌گیریان پێ بکرێ
１１. ماره‌یی به‌تاڵ ده‌کرێته‌وه و له‌به‌رئه‌وه‌ی له ڕووی مادییه‌وه ئامانج به موڵک کردنی ژنه و له جێی ئه‌وه به‌شداری ھه‌ردوو لایه له دابین کردنی ژیانێکی ھاوبه‌ش.
１２. ڕێکخستنی پێشینه‌ی ھاوسه‌رگیری به شێوه‌یه‌کی شارستانیانه
１３. قه‌ده‌غه کردنی فره ژنی.
１４. ھه‌ردوو لا مافیان ھه‌یه که داوای جیابونه‌وه بکه‌ن و ناکرێ جیابونه‌وه به ئیراده‌ی تاک لایه‌نه بێ.
１５. یه‌کسانی له نێوان ژن و پیاو له ھه‌موو پرسه‌کانی میراتی
１６. قه‌ده‌غه‌کردنی شیربایی ، ژن به ژن و ژن له جیاتی خوێن
１７. کوشتن به پاساوی شه‌ره‌ف تاوانه و له ڕووی مادی، مه‌عنه‌وی و یاساییشه‌وه وه‌ک تاوان ده‌بینرێ و ئه‌نجامده‌ری سزا ده‌درێ به‌پێی یه‌و ده‌قه یاسایانه‌ی که له یاسای سزاکانی تایبه‌ت به کوشتنی به ئه‌نقه‌ست دا ھه‌یه.
１８. سه‌پاندنی سزای توند له‌سه‌ر ئه‌نجامده‌رانی خیانه‌تی ھاوسه‌ری به یه‌کسانی بۆ ھه‌ردوولا.
１９. بازرگانی کردن به منداڵ و ژنانه‌وه به ھه‌موو جۆره‌کانیانه‌وه تاوانه و ئه‌نجامده‌رانی سزای توند ده‌درێن ھه‌موو بواره‌کانی بازرگانی (به‌کارھێنانی جنسی، کارکردن به مندالان و بازرگانی کردن به ئۆرگانه‌کانی جه‌سته).
２０. توندوتیژی جیاکاری له دژی ژن قه‌ده‌غه‌یه و جیاکاری وه‌ک تاوان ده‌بینرێ و به‌پێی یاسا سزای ھه‌یه و له‌سه‌ر به‌رێوه‌به‌ری خۆسه‌ری دیموکراتیه که ھه‌موو جۆره‌کانی توندوتیژی جیاکاری قه‌لاچۆ بکات، له رێی میکانیزمای یاسایی و خزمه‌تگوزاری و دابین کردنی پاراستن و به‌رگرتن و چاره‌سه‌ری قوربانیانی توندوتیژی.
２１. له‌سه‌ر به‌رێوه‌به‌رایه‌تی خۆسه‌ری دیموکراتیه که مافی مندالان گه‌ره‌تنی بکات و له ھه‌موو جۆره توند و تیژی و ئیستغلال کردنێک.
حوکمه گشتیه‌کان :
２２. دابین کردنی مافی یه‌کسانی ژن و پیاو تایبه‌ت به یاسای ڕه‌گه‌زێتی
２３. به‌رێوه‌به‌رایه‌تی خۆسه‌ری دیموکراتی له سه‌رێتی بیمه‌ی ته‌ندروستی و کۆمه‌لایه‌تی بۆ تاک و خێزان به تایبه‌تی مندالان و ژنان دابین بکات و بناغه‌ی سه‌ره‌کی ژیانێکی ئازاد و ئابرومه‌ندانه و پاراستن بۆ ژنانی بێوه‌ژن و به‌ساڵاچوو ده‌سته‌به‌ر بکات
２４. ھاوسه‌رگیرکردن به کچان قه‌ده‌غه‌یه له ژیر هه‌ژده ساڵیه‌وه
دەقی نامەکەی مەلا کامەران
نامەیەكی كراوە بۆ بەڕێز: “صالح” مسلم هاوسەرۆكی پەیەدە
بەرێزم: بەو پێیەی بەندە یەكەم مامۆستایەكی ئاینی بووم كە دژایەتی خۆم بۆ هەڵوێستی گروپە ئیسلامیەكان و بەتایبەتیش بەرەی نصرە دەربڕی ئەوكات كە لە عفرین و ناوچە كوردیەكان لە دژتان دەجەنگان، هەروەها یەكەم مامۆستایەكی ئاینی بووم كە دژاریەتی خۆمم دەربڕی لە چوونی گەنجانی كوردستان بۆ نێو ئەو گروپە ئیسلامیانە بۆ شەڕدژی كوردانی سوریاو بەڕاشکاوی ڕام گەیاند کە هەر کوردێک لەشەڕی دژی کوردستانی ڕۆژئاوا بکوژرێت پێی ناوترێت شەهیدو ستەمکارە، وە بۆ ئێستاش هەمووان هەڵوێستی بەندە دەزانن سەبارەت بە داعش و کۆبانی و پێشمەرگەو شەڕڤانەکان….هتد!.
بەهەرحاڵ ئەوەی دەمەوێت لەم نامەیەدا تۆخی بكەمەوە تا خراپ حاڵی بوون ڕوونەدات، ئەوەیە: بەڕێزتان و پەكەکەو پەیەدەو ئەو هێز گەل و ئایدۆلۆژیایە یەكسان نین بە یەك بست لە خاك و نیشتمانی کوردستان، ئێوەو هەڵوێستەكانتان یان بیروباوڕ و ئایدۆلۆژیاتان جیگەی ڕەخنەو قسە لەسەركردنە، ڕاستە ئێوە قوربانی زۆرتان داوە لە مێژووی شۆڕشی نەتەوایەتیدا، بەڵام ئەوە مانای ئەوە نیە ئەوەی دەتوانن بیكەنە دەستورو نەهج و پرۆگرامی حیزبی خۆتان بەهەمان شێوەش بیسەپێنن بەسەر گەلانی ژێر دەستەتانداو ڕەچاوی ئاین و بیروباوەڕی زۆرینەی ئەو خەڵكە نەكەن!، بەتایبەتی ئاینی پیرۆزی “ئیسلام” كە ئاین و بەرنامەی ژیانی زۆرینەی خەڵكی كوردستانەو دەبێت ڕێزی لێبگیرێت، زۆر بەداخەوە وا خەریكە قسەی نەیارەكانمان لەسەرتان دەبێت بەڕاست و گومانە باشەكانی ئێمەش دەبنە هەڵە و بەرگری كوێرانەو دەمارگیری!، وا خەریكە شەرمەزارمان بكەن!، بەڕێزم: دەركردن و پەروایز خستنی ئاین لە ژیانی خەڵكی لە بواری كۆمەڵایەتی ئابوری و سیاسی… جگە لەوەی هاوسۆزی و هاو خەمی موسڵمانان و زانایانی ئاینی میللەتەكەی خۆت لە دەست دەدەیت، هیچ بەرهەمێكی باشیشی نابێت و سەرئەنجام دەبێتە هۆی بەهێزبوونی بزوتنەوە ئیسلامیەكان و ئینتمایی ئاینی، ئەوكات دەبێت بەڕێزیشتان یان وەك ستالین ببەنە دیكتاتۆرێكی خوێن ڕێژی موسڵمان كوژ كە ئەوەش هەر دادت نادات و سەرئەنجام شكست دەخۆیت و لە لوتكەی كۆشكەكەتدا ” قل هو الله أحد ” دەخوێنرێتەوە وەك ئەوەی لە كۆشكی كرملن دا خوێنرا، یان سەرئەنجام وەك ئێستای توركیات لێ بەسەردێ دوای حەفتا ساڵ علمانیەتی تۆتالیتاری و ستەم و نادادی بەرامبەر ئیسلام دواجار لەسەردەستی ئیسلامیەكان ملی شكا !، ئەوەش بزانە ئیسلام پێویستی خەڵكە نەك پێویستی بە خەڵك بێت، ئیسلام ناسەپەێت بەڵكو دەبێت خۆت زۆر مەمنونی ببیت ئەگەرنا منەتی پێت نیە، ئێمە لە زووەوە وتومانە داعش لیزمە لە ئیسلامیدا هەیە و لە چەپ و ماركسی و علمانیەتیشدا هەیە چونكە لۆژكەكەی سڕینەوەی هەموو ئەوانی تر و ڕەنگەکانی ترە ئەوكارەی ئێوەش كە لە
“میرات و مارەیی ئافرەتان” و وەك پێدەچێت لە هەمووشتەكانی تردشدا هەر وایە!، جۆرێكە لە داعشێتی بەسەر زۆرینەیەکی موسڵماندا، ئێمە گومانی هەڵەمان وابوو كە ئێوە هیچ كێشەیەكتان لەگەل خودی ئیسلامدا نیە، بەڵام پێچەوانەكەی ڕاست دەرچوو، ئێوە كێشەتان لەگەڵ خودی ئیسلامدا هەیە، بەم پێیە وا پێدەچێت لای ئێوە دەبێت ئیسلام پێشی موسڵمان باجی لەسەر بێت،
بەڕێز: وا خەریكە دەگەمە كۆتایی نامەكەم، دووبارەی دەكەمەوە بەڕێزت و پارتەكەت شتێكن و نیشتمان و خاك و نەتەوەی كوردوستان شتێكی تر، ئێمە بەردەوام دەبین لە هاوسۆزی و پەرۆشی و یارمەتی و پشتیوانی بست بە بستی خاكی كوردوستان لە هەر چوار پارچەكەداو جیاواز سلێمانی و کۆبانی بۆ ئێمە نییەو بە پەرستشیشی دەزانین، بەڵام لێرە بەدواوە چاوێك بەهەڵوێستەكانماندا دەگێڕینەوە لە پشتوانی و یارمەتی دانی تۆ و پارتەکەت و شەڕەڤانەكانت،خۆ ئەگەر ئێوە پەشیمان نەبنەوە لەو هەڵوێستەتان بەرامبەر بە ئیسلام ئەوە ئێمە پەشیمان دەبینەوەو تەوبەیەكی نەصوحیش دەكەین لەوەی گومانی باشمان زۆر بوو پێتان و زۆر بەتوندی ڕووبەڕووی زۆرێك لە مامۆستایانی ئاینی و برا موسڵمانەكانی ناو خۆمان دەبوینەوە، تا ئەوەی ئێمە ئەوانمان بە خەڵەفاوو ئەوانیش ئێمەیان تكفیر دەکرد لەسەر پشتوانیمان لە جەنابت و پارتە ئایدلۆژیەکەت!،
بۆیە بەندە پێیوایە: هێشتر كات زووە بۆ ئەوەی دڵنیابیتەوە لە سەلامەتی و سەقامگیری حوكومەتەكەت و بێ منەتیت لە ئیسلام و هاوسۆزی موسڵمانان و زانایانی ئاینی!!!، هەم كاتیش ماوە بۆ ئەوەی پێداچوونەوە بکەن بە بڕیار و هەڵوێست و بیروباوەڕەتان بەرامبەر خودی ئیسلام و یاساكانی، بەتایبەتیش یاسای باریكەسێتی لانی كەم بەکۆی گشتی نابێت ڕۆڵی ئاین لەو كانتۆنەی ڕۆژئاوادا كەمتر بێت لە ڕۆڵی ئاین لە هەرێمی كوردستانی باشوردا، ئەگەرنا هەڵوێستمان زۆر لەوەش توندتر دەبێت ئەوكات لۆمەی كەس نەكەن خۆتان نەبێت!.
م ملا كامران علی خواڕەحم
هەینی 14/ 11/2014 ئێستاش
سەرنج بنێرە