ڕۆژزەردانە،
تارمایی سەفین بەسەر تەواوی دێ ڕاکشاوە
کەسەیری قەدپاڵی چیام کرد
بینیم کۆمەڵێ سوار
یەک یەک، دوو دوو
بەرەو چنار دەهاتنەخوار

لەپێشیانەوە، عەولڵا شوڕتە بوو
لەدوای ئەو، حەمەڕەشیدو خالید
سەردار، ئیدریس و کرێکار
زۆرینەبرد، کاکەڕەشیش گەیشت
بەدەنگە نەرمەکەی، سڵاوێکی هەڤاڵانەی کرد !

ئیتر هەر پێشمەرگەبوو، دەهاتەخوار
سەرتات، بەردەرکی مزگەوت، ژێرچنار، چایەخانەکە
ئەو ناوەیان تەواو پڕکرد ..

بەڵام من ،
سەرنجم هەرلای ملەی باریکی ڕێچکەکە بوو !
لەدوای هەمووان
پێشمەرگەیێ، بە هەنگاوی ژیرانەی لار
ووردو هێمن، دەهاتە خوار

هەروەک جاران !
گۆچانەکەی لەدەستی ڕاستی و
کلاشینکۆفە، بێقۆنداغە یازدەکەشی
بەشێوە تایبەتیەکەی بەشانوەبوو ..

هەروەک جاران !
بێ باک، چاڵاک، زرنگ دیاربوو
چاو زیت و ووریا
تریسکەی هیوای پێوە دیاربوو ..
ئەم هەڤاڵە
سواری خۆشناوەتی و سەفین
ئەم هەڤالە
کاک تەحسینی فەرماندە بوو ..

هەولێر